പുഴുക്ക്‌

പുഴുക്ക്‌

ചക്ക / ചേനയും മുതിരയും / കൊള്ളി അഥവാ കപ്പ / പിന്നെ നല്ല ചേരുവകള്‍ ഉണ്ടെങ്കില്‍ അത്‌..
ഇതില്‍ ഏതെങ്കിലും മതി ട്ടൊ..

കഷ്ണങ്ങളും അല്‍പ്പം മഞ്ഞപ്പൊടിയും ഉപ്പും ഇട്ട്‌  ആവ്ശ്യത്തിന്‌  വെള്ളം ഒഴിച്ച്‌ വേവിയ്ക്കുക .

നാളികേരം ജീരകം എന്നിവ അരച്ചതും, നാളികേരം, ഉള്ളി, പച്ചമുളക്‌ എന്നിവ ചതച്ചതും ചേര്‍ത്ത്‌ തിളപ്പിയ്ക്കുക.

പാകമാകുമ്പോള്‍ പച്ച വെളിച്ചെണ്ണ ഒഴിയ്ക്കുക.
കറിവേപ്പില ഇടുക.
സംഭവം റെഡി..

കഞ്ഞിയുടെ കൂടെ കഴിയ്ക്കാം. ചുമ്മാ കോരിക്കഴിയ്ക്കാം.. ചപ്പാത്തിയുടെ കൂടെ വരെ കൂട്ടിക്കഴിയ്ക്കാം.. അതൊക്കെ ഉണ്ടാക്കുന്നവരുടേം കഴിയ്ക്കുന്നവരുടേം ഇഷ്ടം..

***

ഉണ്ണിയപ്പം

ഞാനിന്ന് ഉണ്ണിയപ്പം ഉണ്ടാക്കി. ആദ്യ പ്രയത്നം ആണ്‌ ട്ടൊ.. പരീക്ഷണം തന്നെ.. കാരോല്‍ വാങ്ങി വച്ചിട്ട്‌ ഇതു വരെ പൊതി തുറന്നിട്ടില്ലായിരുന്നു. അഞ്ച്‌ കുഴികള്‍ ഉള്ള കാരോല്‍ ആണ്‌. ആദ്യം ഉണ്ടാക്കിയത്‌ , അഞ്ച്‌  എണ്ണവും കരിഞ്ഞു. ഹിഹി.. പിന്നെ ഉണ്ടാക്കിയ അഞ്ചെണ്ണം നന്നായി. കുറ്റം പറയാതെ കെട്ട്യോന്‍ കഴിച്ചു. അതാണ്‌ അതിണ്റ്റെ ഹൈലൈറ്റ്‌.. .

 അപ്പൊ നമുക്കു തുടങ്ങാം? ഉണ്ണിയപ്പം അഥവാ കാരോലപ്പം ..

നമുക്ക്‌ ആവശ്യമായ കൂട്ടുകള്‍ താഴെപ്പറയുന്നവയാണ്‌.. :

ശര്‍ക്കര ഉരുക്കിയത്‌ - ആവശ്യത്തിന്‌(അധികം ആയാല്‍ അടി പിടിയ്ക്കും, മൃദുത്വം കുറയും).
ഒരു കപ്പ്‌ അരിപ്പൊടിയ്ക്ക്‌ ഒരു കപ്പിണ്റ്റെ മൂന്നിലൊന്ന് മൈദ ( മൃദു ആകാന്‍)
നാളികേരക്കൊത്ത്‌ (സ്വാദിന്‌).. )
മൂന്ന് ഏലക്കായ പൊടിച്ചത്‌..

ഈ പറഞ്ഞവയൊക്കെ കോരി ഒഴിയ്ക്കാവുന്ന പരുവത്തില്‍ കുറുക്കി എടുക്കുക. ആറുമുതല്‍ എട്ട്‌ വരെ മണിക്കൂറുകള്‍ ഇതു അവിടെ ഇരിക്കട്ടെ.

അപ്പക്കാര അഥവാ കാരോലില്‍ നിറയെ എണ്ണ(സണ്‍ഫ്ളവര്‍, വെളിച്ചെണ്ണ, ഏതെങ്കിലും മതി) ഒഴിയ്ക്കുക (ഡാല്‍ഡയോ നെയ്യോ ചേര്‍ക്കാവുന്നതാണ്‌ ). ചൂടാക്കുക.
പാകത്തിന്‌ ചൂടായാല്‍ നമ്മുടെ മിശ്രിതം കോരി ഒഴിയ്ക്കുക.
തിളച്ച്‌ പൊന്തുമ്പോള്‍ മറിച്ചിടുക. രണ്ട്‌ ഭാഗമായാല്‍ പപ്പടം കുത്തി കൊണ്ടോ സ്പൂണുകൊണ്ടോ കുത്തി എടുക്കാവുന്നതാണ്‌. ഒരു കടലാസില്‍ ഇട്ട്‌ എണ്ണ വലിച്ചെടുക്കുന്നത്‌ നല്ലതായിരിയ്ക്കും. എണ്ണകുടിയന്‍ ആണ്‌ അപ്പം.

വേറെ ഒരു പരിപാടി കൂടെ ചെയ്യാവുന്നതാണ്‌. അരിപ്പൊടിയ്ക്ക്‌ പകരം ഗോതമ്പ്‌ പൊടി(ആട്ട), റവ എന്നിവയുടെ കൂട്ട്‌ ഉപയോഗിക്കാം. ഇതാവുമ്പോള്‍ ഒരു മണിക്കൂറ്‍ വച്ചാല്‍ മതി. പെട്ടെന്ന് ഉണ്ടാക്കി തുടങ്ങാം.

***